بقلم الدكتور... عزالدين حسين أبو صفية... صباح الخير يا وطني

صباح الخير يا وطني ::

خبرني عنك
يا وطني
وعن الماضي
عن اللي غادرك
واللي غَدَرَك
بعد ما سرق الشَعب
وسرقك
خبرني يا وطني
عن أحوال الأهل
والجيران
وعن الخلان
هل غَيّرهم
سوء الأحوال
ولا بقيوا على العهد
زيّ زمان
قتلني الحنين
لتقبيل ...
ترابك
بَسْ أنا خايف أزورك
خايف من السجان
خبرني يا وطني
شو مصير المصالحة
وشو أخبار الأنقسام
عن شو ولا شو أخبرك
والله أنا خجلان
الانقسام ...
صار انقسامين
والوطن ...
صار وطنين
والشَعب ...
صار شعبين
والشُعبة ...
صارت شُعبتين
والزعامة ...
ما ظلت زعامة
ولا زعامتين
صارت زعامات
والرأس ...
ماظل رأس
ولا صار رأسين
الله وكيلك
صرنا مثل كيس البصل
كلنا رؤوس
بس العفن صار
يُنخر في عظم الوطن
مثله مثل الإستيطان
خبرني يا وطني
شو في كمان
في كثير وكثير
في الرسالة الثانية
حأخبرك
عن الأرض
اللي ما عاد ليها حرمة
ولا عرض
وعن التلوث والعنوسة
وعن البطالة
والحال المايل
وعن انشراح
بالمناسبة ...
شو أخبارها انشراح
ما ضل انبساط
ولا ظل انشراح
وبطلت تزغرد
لا في الإنطلاقات
ولا في الأفراح
وإن سألتني ليش
أقول لك ... لأن
اللي جاي أسوأ
من اللي راح

د. عز الدين حسين أبو صفية ،،،